က္ကြာဝဠာဖြစ်ပေါ်လာပုံကို လက်တွိ့စမ်းသတ်ခြင်း

စာချေတယောက် ရွှီဂစ်ကန်ပိန်းစတင်လှုပ်ယှားမှုကိစ္စနန့် ဘင်္ဂလာကအပြန် ကာလာကတ္တားကို မ၀င်ခင် ၅ မိနစ်လောက်အလိုမှာ စီလာရေဘစကား ရပ်စစ်ဆေးခံလိုက်ရရေ..။ BSF (Border Security Force) စစ်သားတိနန့် ရဲသားတိလေ့ အများကြီး။ အရပ်ဝတ်နန့်လူတိလေ့ ၀ါးကီတွားကီတိကိုယ်စီနန့် တယောက်ကိုလေ့ အလွတ်မပီး စစ်ဆေးနီကတ်တေ။ စာချေနန့် သူငယ်ချင်းကိုတွိ့စွာနန့် ဘစကားထက်က ဒရွတ်တိုက်ဆွဲချလားခရေ။


ရဲစခန်းလား၊ စစ်စခန်းလားလို့ မသိရရေ စစ်ဆေးရေးစခန်းတခုကိုရောက်လားခရေ..။ လက်နှစ်ဖက်ကို သံကွင်းတိပါရေ ကြိုးရှည်နှစ်ပင်နန့် ချိုင်ရေ။ ခြီထောက်နှစ်ချောင်းကိုလေ့ ချိုင်ထားလိုက်တေ။ ဇောက်ထိုးမိုးပြန် တွဲလောင်းချိုင်ထားရေ။ စာချေမျက်နှာတိ တဖြည်းဖြည်း ရောင်တက်ပါလတ်တေ။ ၀မ်းထဲကအူတိ ရင်ဖတ်မှာတင်နီရေပိုင် ခံစားရရေ။ ရခိုင့်တော်လှန်ရေးအကြောင်းတိကို မီးကတ်တေ။ မဖြေနိုင်ကေ မျက်နှာကို ရီနန့်လောင်ကတ်တေ။ ကြောရိုးကို စိတ်ကြစ်သတ်ကတ်တေ။

ညာစာပိုင်လောက်ရောတေခါ အခန်းထဲကို နောက်လူတသုတ် ၀င်လာကတ်တေ။ စာချေက မမြင်ရ။ မျက်စိတိ ရောင်ပြီးကေ မှိတ်နီရေ။ စာချေကို ရီတခွက်တိုက်တေ။ ထိုင်ခုံတလုံးမှာ ထိုင်ခိုင်းပြီးကေ စစ်ဆေးကတ်ပြန်ရေ။ ကျောင်းတက်ခရေ အကြောင်းတိကိုမီရေ။ တက္ကသိုလ်မှာ ဇာဘာသာရပ်တိကို သင်ခလေ မီးပြန်ရေ။

``Social Science and administration`` နန့် ကျောင်းတက်ခရေလို့ စာချေဖြေလိုက်တေ။

``သိပ္ပံပညာရပ်တိကို စိတ်မ၀င်စားလား`` မီးလာရေ။

``စိတ်ဝင်စားရေ`` လို့ ဖြေလိုက်တေ။

``Big Bang အကြောင်းကို စိတ်မ၀င်စားလား``မီးလာရေ။

``အာ..စက္ကြာဝဠာကြီးဖြစ်ပေါ်လာရေ အစလေ..။
အူး..စိတ်ဝင်စားတောင်ကလာ`` ကောင်းကောင်း နှစ်နှစ်သက်သက် ဖြေလိုက်တ။ မီးနီယင်း၊ ဖြေနီယင်းနန့် တခြားအကြောင်းရာတိကို ရောက်လားရေ။ စာချေလေ့ ရယ်ရယ်ပြုံ့ပြုံ့နန့် ရင်နှီးပါလတ်တေ။ မမျှော်လင့်ထား မီးခွန်းတခု ပေါ်ထွက်ပါလတ်တေ။

``ခိုင်ရာဇာကို ဇာခါတွိ့ခလေ၊ ဇာမှာလေ``

``မေဇူရမ်မှာ တွိ့ခရေ``

ဘဲတဖက်ကရပ်နီရေ လူတယောက်က စာချေမျက်နှာကို လက်ဝါးကြီးနန့်ု ချုပ်သတ် သတ်ပလိုက်တေ။ ကောင်းကျယ်လောင်ရေ အသံတခုကို စာချေကြားလိုက်တေ။ လောကကြီးတခုလုံး မဲမှောင်ကျလားရေ။ အမှောင်ထုထဲမှာ ရောင်စုံအလင်းတန်းတိ ပေါ်ထွက်လာစွာကို စာချေမြင်လိုက်ရရေ။ မျက်လုံးတိ ပုဒလုံးတောက်လားရေ။ မျက်နှာမှာ နှာခေါင်းဟိသိမ့်လာလို့ လက်နန့်အသာချေ စမ်းကြည့်လိုက်တေ။ မျက်နှာတခုလုံး အားလုံးသွီးတိ။ မျက်စိမှိတ်ပြီးကေ ငြိမ်ပြီးကေ နီလိုက်တေ.။

တနာရီလောက်အကြာမှာ ပင်ဂျာဘီဝတ်စုံးနန့် လူတယောက်ဝင်ပါလတ်တေ။

``အဝေ..စာချေ သမာန်ဒလင်းမှာရာ အိပ်နီလာ။ ထ..ထ..ထ။
လက္ဖရည်သောက်ကား…ဝေ..။`` ပြီးကေ စာချေကို ဆွဲထူးရေ။

စာချေမျက်စိမပွင့်တပွင့်နန့် လက္ဖရည်ကိုစမ်းသောက်လိုက်တေ။ မီးစွဲပီးလာရေ ဆီးကရတ်ကို ဖော်လိုက်တေ။ စိတ်ထဲမှာ ကျေးဇူးတင်နီမိရေ။

``မင်း… Big Bang အကြောင်းကို လက်တွိ့မြင်လိုက်ရလာ….``

စာချေစိတ်ထဲမှာ မခံချိမခံသာနန့်၊ ၀ီဝီ၀ီဝီ လည်လားရေ။ မှိတ်နီရေမျက်လုံးကို အားတင်းဖြဲပြီးကေ မကျေနပ်တေစိတ်နန့် မျက်စောင်းထိုးကြည့်လိုက်တေ။ ပြီးကေ ဂေါင်းတညှိတ်ညှိတ်လှုပ်ပြလိုက်တေ..။ စိတ်ထဲမှာ…မင်းရို့ပြောရေ Big Bang ဆိုစွာ အေချင့်ကိုပြောစွာကို.. တွေးနီလိုက်တေ။

ခိုင်မြသိန်း (ချောင်သာကြီး)
၂၁၊ ၁၂၊ ၂၀၁၂
Glada Hudik