ကျရေနီရာက ထမ်းဆောင်မည်

စာချေတယောက် တိုင်ပြည်နန့်လူမျိုးအတွက် ကျရာတာဝန်ထမ်းဖို့ ယတိပြတ်ဆုံးဖြတ်လိုက်ပြီးကေ တော်လှန်းနီမြီးကိုရောက်ပါလတ်တေ။ စာချေကလေ့ သတန်းဆင်းခါစ စစ်တိုက်ဖို့ သွီးမြွနီရေချိန်။ တရက်တရက်ရောက်လာကေ ရှိတန်းထွက်ဖို့၊ စစ်တိုက်ဖို့ကျဲ တွေးနီရေ။ တရက်နိ မိုးထက်စောစော တပ်ကြပ်ကြီးက တပ်သားတိကို တန်းစီဖို့ ၀ီစီမှုတ်လိုက်တေ။ တက်ကြွရေ စာချေက အယင်းဆုံးတန်းစီလိုက်တေ။ စာချေစိတ်ထဲမှာ အေနိခါ ရှိတန်းထွက်ရဖို့ထင်ထားရေ။ တန်းစီနီရေ တပ်သားတိကို တပ်ကြပ်ကြီးက..

```ဗဟိုလ်ဌာနချုပ်မှာ ပါတီညီလာခံ ဟိရေ။ အနယ်နယ် အရပ်ရပ်က ပါတီကိုယ်စားလှယ်တိ လာကတ်ဖို့၊ ယင်းအတွက် ပါတီကိုယ်စာူလှယ် လူကြီးတိကို ဗဟိုလ်ဌာနချုပ်ကို လိုက်ပို့ရဖို့။ တိုင်ပြည်နန့်နန့်လူမျိုးအတွက် ကျရေနီရာက ကျရေတာဝန်ကို ထမ်းနိုင်ကတ်လာ…´´´ အာရင်းသံကြီးကြီးနန့် အော်မီးလိုက်တေ..။


တပ်သားတိကလေ့ …```ထမ်းနိုင်ပါရေ```` သံပြိုင်အော်လိုက်တေ။ တောင်စိုင်ကြားထဲကို ပဲ့တင်ခပ်လားရေ။

``ကောင်းပျာ..။``

``ငမိုက်..``` ဟိ ဆရာ```

``မိုက်ခဲ`` ``ဟိ ဆရာ``

``လထက်မိုက်`` ``ဟိ ဆရာ``

``စာချေ`` ``ဟိ ဆရာ``

``မင်းရို့လေးယောက် ၀ါးနက်သားခွတ်ပြီးကေ ထမ်းစင်တခုလုပ်။ မိုးထက်ထမင်း မစားခင်အပြီးလုပ်။ ကြားလာ``

``ကြားပါရေ``

``ကျန်ရေ တပ်သားတိ ရိပ်ခါဖြည့်..။ ခရီထွက်ဖို့ အဆင်သင့် လုပ်ထား။ ဟုတ်လာ``

``ဟုတ်ပါရေ``

နောက်တရက် မိုးထက်စောစော အိန္ဒိယ+ရခိုင်နယ်စပ်ကို ခရီထွက်လာကတ်တေ။ စာချေရို့လေးယောက်ပါရေ တပ်စိပ်က အမျိုးသမီးတယောက်ကို အလယ်ကထမ်းလို့ ဌေးကာတောင်တန်းကို တဖြည်းဖြည်း ဖြတ်ကျော်တက်လာကတ်တေ။ လေးယောက်တသုတ်၊ လေးယောက်တသုတ်စီ လှဲထမ်းကတ်တေ။ ဌေးကာတောင်တ၀က်လောက်မှာ စာချေရို့လေးယောက် တာဝန်ကျရေ။ ထမ်းနီယင်း ထမ်းနီယင်းနန့် ငမိုက်က

``မင်းဘာဘုရင် မောက်သူဇာ မင်းသမီးသိမ်းယူခရေခါ ဆင်ဖြူစီလို့ယူခရေလို့ ကြားဖူးရေကား``။

အထက်က ထိုင်နီအမျိုးသမီးက ပြုံ့လို့ရယ်လိုက်တေ။

``အူးး ယင်းချင့်ထက် ကြီးကျယ်စွာဟိသိမ့်ယင့်..။ ပတ္တမြားဒေ၀ီစိုးမဲကျီကို မြောက်ဦးနန်းတော်ကို ယူလာခါ ယင်းခါမလားကြီးကျယ်စွာ။ ငွေထမ်းစင်နန့် ထမ်းလို့ခစွာ။ ငွေထမ်းစင်တဖက်တလျှောက် အတီးအမှုတ်၊ အကအခုန်တိနန့် ဖျော်ဖြည်လို့တောင် ပါရေပြောရေ..`` မိုက်ခဲက မျက်ခုံးချေကို ပင့်လို့ပြောလိုက်တေ။

အထက်ကထိုင်နီရေ အမျိုးသမီးက ခါးချေကို ကော့ပြီးကေ ရင်ဖတ်ချေမောက်လို့ တင်လိုက်တေ..။ ဆံပင်ချေတိကိုလေ့ လက်ချေနန့် ပုခုန်းထက်သလို့ တင်လိုက်။ ကျေနပ်ပြုံ့ပြုံ့လို့။

လထက်မိုက်ကလေ့ မခံချင်။ မင်းရို့ကျဲဗဟုသုတဟိစွာ မဟုတ်။ ငါမှာလေ့ လူကြီးသူမတိ ပြောစွာကို ကြားဖူးစွာ အများကြီး..မခံချင်စိတ်နန့် ၀င်ပြောလိုက်တေ။

```နတ်သျှင်မယ်မင်းသမီးကို မဟာသမတ္တရာဇာဘက်ကို ဆက်သရေခါ ခုနှစ်ညာဥ့်ခုနှစ်ရက် ပွဲလမ်းသဘင်လုပ်ပြီးကေ ရွှီထမ်းစင်တဖက်တလျှောက်မှာ အတီးအမှုတ်၊ အကအခုန်၊ အောင်လံတိထမ်းလို့ အပျိုစင်တိ ၀ိုင်ရံပြီးကေ ထမ်းလာစွာ နတ်ပြည်ဆင်းလာပိုင်လတ်..```

အထက်ကထိုင်နီရေ အမျိုးသမီးက ကောင်းကျေနပ်အားရသံနန့် ``မောင်ချေရို့ ကောင်းကောင်းဗဟုသုတ်ဟိကား….။ အဲ..ယင်းကြောင်း တော်လှန်ရေသမားဖြစ်စွာ။ မောင်ချေရို့ကို ကောင်းချီးကျူးရေ..``။ သူ့ကိုယ်သူလေ့ ဂုဏ်ယူဝံကြောပြီးကေ မင်းသမီးချေတယောက်ပိုင် ထင်မြင်ခံစားနီပုံပေါ်ရေ။ ကိုယ့်ခန္ဓာကိုယ်လုံးကိုယ်ပေါက်ချေကိုလေ့ ပြန်ကြည့်လိုက်တေ..။

နှုတ်ပိတ်ပြီးကေ နားထောင်နီရေစာချေက ပုခုန်းပြောင်းထမ်းလိုက်ပြီးကေ

```ယကေ.....အစ်ကို ကျန်တော်ရို့ထမ်းလာရေ ပါတီအတွင်းရေမှုလေ့ ဇာညံ့ခီဖို့လဲ…။ ၀ါးစင်နန့် လေးယောက်ထမ်း မင်းသမီးရာမဟုတ်လား..။ လေးယောက်ထမ်းကို လေးယောက်ထမ်း..```

``ဟိုင်း အေကောင်းချေ ဇာပြောစွာလေ နင်..။ နမိတ်မကောင်း နမာမကောင်း…။ အသုဘ ထင်လာနင် ငါကို….၊ ချ…ချ..ချ အေကု..ချ ထမ်းစင်က အေကု..ချ။``

``မဟုတ်ပါ အတွင်းရေးမှု ကောင်းခါးညောင်းရေ၊ ပုခုန်းနာပါရေ။ တိုင်းပြည်နန့်လူမျိုးအတွက် ထမ်းရစွာ ကောင်းလီးပါရေ အတွင်းရေမှု..။ တနားချေ အညောင်းဖြေကတ်ပါမေ..```

ခိုင်မြသိန်း (ချောင်းသာကြီး)
၁၅၊ ၁၂၊ ၂၀၁၂
Glada Hudik